Tasiilami Ittoqqortoormiinilu mittarfinngoriaannaasunut nutaanut sulineq ingerlaqqissasoq Inatsisartut akuersissutigisimavaat. Tamanna nunap immikkoortuini mittarfissat salliutinneqarnissaannut tunngavissat pillugit Inatsisartut aalajangiiffigisassaattut Siunnersuut (UKA2020/27) aqqutigalugu pisimavoq.
Naalakkersuisut 2020-mi ukiakkut ataatsimiinnissaq sioqqullugu sumiiffinnut ataasiakkaanut ilanngussani nalunaarusiat atorlugit periarfissanut nalunaarusiamik suliaqartitsisimapput.
- Nunap immikkoortuini mittarfissanut aningaasaliiffiusinnaasut pillugit nalunaarusiaq
- Ilanngussaq 1: Qeqertarsuup Tunuani nunap immikkoortuani mittarfissanut periarfissanut misissuinermi Qeqertarsuarmi, Qasigiannguani Kangaatsiamilu mittarfiliornissanut periarfissat sammineqarput
- Ilanngussaq 2: Kujataani nunap immikkoortuani mittarfissanut periarfissanut misissuinermi Narsaq Nanortalillu sammineqarput
- Ilanngussaq 3: Uummannami mittarfissaq pillugu periarfissanut misissuineq
- Ilanngussaq 4: Ittoqqoortoormiini mittarfissaq pillugu periarfissanut misissuineq
- Ilanngussaq 5: Tasiilami mittarfissaq pillugu periarfissanut misissuineq
Pingaarnersiuinissamut tunngaviusussaq tassaavoq suliniutissat pissarsiffiunerpaasussat suliniutinit piareersaaffiginerpaasussanit salliutittarnissaat.
Tasiilami Ittoqqoortoormiinilu mittarfinnik 799 meterisut takissusilinnik sanaartornissaq imminut akilersinnaanerussasoq misissueqqissaarnerni inerniliunneqarpoq.
2022-mi Naalakkersuisut aamma Aningaasaqarnermut Akileraartarnermullu Ataatsimiititaliaq mittarfinngoriaannarnut marluusunut tunngatillugu isumassarsiatut saqqummiussissummut 2,0 mio. kr.-nik immikkoortitsisimapput. Isumassarsiamut saqqummiussissut Kalaallit Airports A/S-imit suliarineqassaaq. Isumassarsiamut saqqummiussissut pilersaarusiornissamut atortussaviit suliaralugit ingerlaannassappata siullertut alloriarnerussaaq. Suleriaqqinnissaq nutaaq aallartitsinnagu Naalakkersuisut Inatsisartullu ingerlaavartumik akuersissuteqartassapput.