Kalaallit Nunaanni atortutigut attaveqaasersuutini illoqarfinni aqquserngit, umiarsualiviit, mittarfiit imaatigut kabelit sakkortusaaviillu allallu pineqarput. Ineqarnermut Attaveqaasersuutinullu Naalakkersuisoqarfik attaveqaasersuutinut assartugassat ilaasullu angallannissaannut pisariaqartinneqartunut akisussaavoq.
Atortutigut attaveqaasersuutit
Atortutigut attaveqaasersuutit pilersaarusiorfiginissaannut, sanaartorfiunissaannut, ingerlannissaannut iluassaattarnissaannullu Naalakkersuisut kommunillu akisussaapput. Taamaammat tamatuma qanoq ingerlannissaanut attaveqaasersuutinullu aningaasanik akuersisarnissamut Inatsisartut inatsisiliorsinnaatitaapput.
Attaveqaasersuutit aaqqissuunnissaanni assigiinngitsunik piginnittuusoqarsinnaavoq ingerlatsisoqarsinnaallunilu.
- Namminersorlutik Oqartussanit pigineqartut – matumani umiarsualivinnik inuussutissarsiornermit tunngasunik pigisaqartut amerlanersaat pineqarput.
- Kommuninit pigineqartoq - matumani sumiiffinni najugaqarfiusuni aqquserngit umiarsualiviillu ilaat pineqarput.
- Suliffeqarfiit Namminersorlutik Oqartussanit pigineqartut - matumani assersuutigalugu mittarfeqarfiit, Sikuki-p umiarsualivia Nuummiittoq aammalu nuna tamakkerlugu attaveqaatitigut nalunaarasuartaateqarneq (Tusass A/S) pineqarput.
Tamatuma saniatigut sanaartukkat namminersortunit pigineqartut ataasiakkaat kiisalu sanaartukkat Illersornissaqarfimmiit pigineqartut pineqarput.
Attaveqaasersuutini sanaartukkanut, ingerlatsinernut iluarsaasarnernullu aningaasaliinissat qulakkeernissaannut piginnittoq akisussaavoq. Attaveqaasersuutinut Namminersorlutik Oqartussanik kommuniniillu pigineqartunut sanaartornerit ingerlatsinerillu akileraarutit aqqutigalugit imaluunniit atuisut akiliuteqartinnerisigut aningaasalersorneqarsinnaapput. Attaveqaasersuutit suliffeqarfinnit pigineqartut atuisut akiuliutaannik aningaasalersorneqarput.
Nunaannarmi, imarmi silaannarmilu malittarisassaqartitsineq
Suliassat pillugit inatsisit amerlanerpaartaat suli naalagaaffimmi inatsisitigut suliaapput. Matumani imaatigut angallannermut tunngasut, silaannakkut angallannermut tunngasut, aqqusinikkut angallannermut tunngasut aamma ratiukkut attaveqaatinut tunngasut pineqarput. Tamanna isumaqarpoq inatsisit Folketingimit suliarineqartassasut, oqartussaniillu tamatumunnga Danmarkimi akisussaasuniit aqunneqartassallutik.
Attaveqaasersuutit ilarujussui sunniuteqartarput nunat tamalaat killeqarfiinik akimuisunik. Taamaammat inatsiseqartitsineq arlaatigut nunat tamalaat malittarisassaannik aammalu suliassaqarfimmut isumaqatigiissutinik killeqartinneqarpoq.
Suliassaqarfinnut suli tiguneqarsimanngitsunut tunngatillugu Naalakkersuisut inissisimanerat tassaavoq naalagaafimmi oqartussanik suleqateqartarnissaq, matumani malittarisassat aqutsinerillu Kalaallit Nunaanni pissutsinut naleqqussarnissaat qulakkeerniarlugu.
Suliassaqarfiit nalunaarasuartaateqarnermi attaveqaatinut allakkanullu tunngasut tiguneqareersimapput. Taamaammat Inatsisartut inatsiseqartitsinermut akisussaapput, Naalakkersuisullu suliassaqarfiit tamakku aqunnissaannut akisussaallutik.