Assartuussineq pillugu Isumalioqatigiissitaq 2009-mi Naalakkersuisunit pilersinneqarpoq. Angallannermut suliassaqarfimmut takorluukkamik suliaqarnissaq aammalu takorluugaq qanoq isilluni piviusunngortinneqarsinnaanersoq siunertaasimavoq. Naalakkersuisut 2011-p kingorna angallannermut suliassaqarfimmi misissueqqissaarsimanerat aalajangiinerilu Angallanneq pillugu Isumalioqatigiissitap isumaliutissiissutaanik 2011-meersumik arlaatigut tunngaveqarput.
Isumalioqatigiissitaq makkuninnga innersuussuteqarpoq:
- Nunatsinni qitiusumik mittarfiup Kangerlussuarmiit Nuummut nuunneqarnissaa
- Kujataani mittarfiup Narsarsuarmiit Qaqortumut nuunneqarnissaa
- Nuummi containerinut umiarsualivissap nutaap sananissaa
- Kujataani qulimiguulinnut taarsiullugu angallatinik assartuinerup atornissaa
- Ilulissani mittarfiup tallinissaa
- Nanortalimmi mittarfissap sanaartornissaa, Paamiunilu mittarfiup atorneqarpiarunnaarnissaa
- Tasiilami Ittoqqoortoormiinilu mittarfinnik sanaartornissaq
- Qaqortup Narsallu akornanni aqqusinermik angallammillu attaveqarnissap sanaartorfiunissaa
- Qaarsut Uummannallu akornanni aqqusinikkut angallatitigullu angallannissap pilersinnissaa
- Qaanaami mittarfiup matuneqarnissaa
Assartuussineq pillugu Isumalioqatigiissitap sulinera
Assartuussineqpillugu Isumalioqatigiissitaq inuussutissarsiortuniit aallartitanik taamanikkullu KANUKOKA-mit (nunatsinni kommunit peqatigiiffiat) professor Christen Sørensen siulittaasoralugu inuttaqarsimavoq.
Suliassaqarfinnut makkununnga attaveqaataasartussanik arfinilinnik pilersitsisoqarsimavoq:
- Imaatigut angallannermi sullissisut, piginnittut aningaasaliisullu
- Angallannernik pisisartut namminersortut (suliffeqarfiit)
- Kommunit - taakkununnga kommunini ingerlatsiviit suliffeqarfiillu ilanngullugit
- Ilaasut - sulisartunit, sulisitsisunit timersortartuniillu inuit ataasiakkaat suleqatigiiffiillu
- Allat soqutiginnittut.
Attaveqaataasartussani inuit 50-t peqataasimapput.
Isumalioqatigiissitaq sineriammi isorartuumi imaatigut angallassisarneq Kujataanilu attaveqaasersuutit pillugit nassuiaatit ilassaannik marlunnik suliaqartitsisimavoq.