Narsarsuup siunissaa pillugu suleqatigiissitami sulinerup siuariartornerani killiffik pillugu isummernissamut tunngavissiaq, Naalakkersuisut 2024-mi sisamanngornermi januaarip 25-ani oqaluuseraat. Suleqatigiissitap inassuteqarneratigut Naalakkersuisut aalajangerput, suleqatigiissitap atuunnera Qaqortumi mittarfissap ammarnissaata tungaanut sivitsorniarlugu.
Suleqatigiissitap atuunnera Qaqortumi Mittarfittaassap ammarnissaata tungaanut sivitsorneqassasoq, Kommune Kujalliup aamma kissaatiginikuuaa. Tamatumani qulimiguulinnut mittarfinngortitsinermi ingerlatarpaalunnik suli qulaajagassaqarnera, Narsarsuarmilu inuussutissarsiutitigut periarfissat pillugit suleqatigiittoqarnissaanik pisariaqartitsisoqarnera tunngavilersuutigineqarpoq. Narsarsuarmut tunngatillugu suleqatigiissitap sulineranut attaveqaasersuutitigut ingerlatat arlaqartut aamma sunniuteqarmata, Ineqarnermut Attaveqaasersuutinullu Naalakkersuisup sivitsuineq taanna iluaqutaasussatut isigaa.
Ineqarnermut Attaveqaasersuutinullu Naalakkersuisoq Hans Peter Poulsen ima oqaaseqarpoq:
”Suleqatigiissitaq 2023-mi pitsaasunik, angusaqarnartunillu ataatsimiittarsimammat Naalakkersuisut nuannaarutigaat, suleqatigiissitallu atuunneranik sivitsuineq Narsarsuup siunissaanut iluaqutaassasoq neriuutigalugu. Narsarsuarmut iluaqutaasinnaasunik inuussutissarsiutitigut periarfissaqarluarpoq.”
Kommune Kujallermi borgmesteri Stine Egede ima oqaaseqarpoq:
”Narsarsuup siunissaa pillugu suleqatigiittoqarnissaa, ataqatigiissaarisoqarnissaalu suli pisariaqartinneqarmat, suleqatigiissitap atuunnera sivitsorneqassasoq kissaatiginikuuarput. Sumiiffiup kusanaqisup, oqaluttuassartaqaqisullu ineriartortinneqarnissaani aningaasaleerusussuseqarneq, nutaamik eqqarsarneq, najukkamilu peqataaneq pingaaruteqarput.”
Tunngavigisaq: Kommune Kujallermi inuussutissarsiornermut ingerlatsivik suleqatigiissitamut allatseqarfiuvoq. Suleqatigiissitaq minnerpaamik qaammammut ataasiarluni ataatsimiittassalluni anguniarnikuuaa. 2023-mi ingerlatarpaaloqarpoq, suliarpaaluillu Narsarsuarmut attuumassuteqartut suleqatigiissitap oqaluuserinikuullugit.
Killiffimmik nalunaarusiaq kiisalu suliassiissut nutartitaq nittartakkami www.kanat.gl-imi kiisalu Kommune Kujalliup nittartagaani www.kujalleq.gl -imi atuarneqarsinnaapput.
Annertunerusumik paasisaqarusunnermi Ineqarnermut Attaveqaasersuutinullu Naalakkersuisoqarfik attaveqarfigineqassaaq, uunga box909@nanoq.gl
Nittartakkanut iserfissat