Nalunaarasuartaatitigut attaveqaatinik niuerfik akuersissutinik ammasumillu ingerlatsinissanik agguagaavoq. Illoqarfiit nunaqarfiillu akornanni elektroniskiusumik attaveqaatit aamma nunanut allanut attaviit (aamma ungasissumut attaveqarnertut taaneqartoq) Tusass-imut akuersissummut ilaapput. Interneteqarnissamut pisartagaqarnerit ammasumik tuniniagaapput, nalunaarasuartaateqarnermullu neqeroortartut arlallit interneteqarnissamut attaveqaatinik tuniniaasarput.
Naalakkersuisut nalunaarasuartaateqarnermut akisussaaneranni inatsisit eqqortut inissinnissaat qulakkeerniarneqarput. Nalunaarasuartaateqarnikkut attaveqaatinut pisortat tapiissuteqarneq ajorput. Tusass ungasissumut attaveqaatitigut attaveqartarnermut akuleruussitsisarpoq. Taamaaliornikkut Kalaallit Nunaanni nalunaarasuartaatinik atuisut tamarmiullutik aningaasartuutit avittarpaat.
Inoqarfinni tamani nalunaarasuartaatitigut attaveqalernissap periarfissaalernissaata aammalu nalunaarasuartaatinik atuisut imminnut ataqqeqatigiillutik aningaasartuutinik avitseqatigiittarnissaasa qulakkeernissaat inatsisini siunertaavoq.
Telestyrelsen suliffeqarfinnik nalunaarasuartaateqarnermik sulialinnik nakkutiginnittuussaaq, nalunaarasuartaateqarnermullu tunngasunut Naalakkersuisunut siunnersuisassalluni.
Radiup maligaasai imaanilu ajornartoornermi sillimaniarnissamullu radioqarneq suli tiguneqarnikuunngillat
Radiup maligaasai attaveqaatinut aqqutilersugaanngitsunut tamanut pingaaruteqarput, apeqqutaanani wi-fi imaluunniit satellitikkut attaveqaatit pineqarnersut. Radiup maligaasaanut suliassaqarfik maligaasat pillugit inatsisini malittarisassiorneqarpoq. Telestyrelsen naalagaaffimmi oqartussat sinnerlugit Kalaallit Nunaanni maligaasat pillugit inatsisinik aqutsisuuvoq. Telestyrelsenimi immikkoortortaq alla radiup maligaasaanik sulissuteqartoq Radiunut Aqutsisoqarfimmik aamma taaneqartarpoq.
Imaani ajornartoornermi sillimaniarnikkullu radiumi VHF-ikkut antenikkut attaveqaatit aamma Aasiaat Radioani sinerissamut radioqarfik pineqarput. Styrelsen for Dataforsyning og Infrastruktur suliassaqarfiup ingerlannissaanut Tusass-imik isumaqatigiissusiorsimavoq.