Attaveqaatit sooq-una Kitaanut naleqqiullugit Tunumi ajornerusut?
Kitaani Nanortalimmiit Upernavimmut imaatigut kabeli atorlugu attaveqaateqarpoq, toqqaannartumik imaluunniit sakkortusaaviit aqqutigalugit. Tunumi Avannaarsuanilu internetikut attaveqaatit oqarasuaatikkullu attaveqaatit satellit atorlugu ingerlasarput. Satellitit imaatigut kabeliniit pisinnaasakinnerujussuupput, internetikut sukkassuseq kigaanneruvoq, oqarasuaatikkullu attaveqarniartarnerni kingusinnerusarput. Killiliinerit satellitit tunniuttagaasa iluanni attaveqaatit pitsanngorsaaffiginiarlugit Tusass sulissuteqarpoq.
Tunumut imaatigut attaviliinisoqarsinnaava?
Tamanna teknikip tungaatigut periarfissaanersoq aammalu taamaaliortoqassappat qanoq akeqassanersoq naliliiffigitinnagu annertunerusumik immap naqqanik sikullu pissusaanik misissuisoqassaaq. Taamaaliortoqassappallu Maniitsumut, Sisimiunut Aasiannullu imaatigut kabelip tallineqarneraniit tamanna akisunerujussuanngortussaavoq, massakkullu Tusass-ip aningaasaliinissanut pilersaarutaanut tamanna ilaanngilaq.
Sooq-una imaatigut kabeli Aasiannukartoq Ilulissanut ingerlateqqinneqanngitsoq?
Imaatigut kabeli Qasigiannguanut Ilulissanullu ingerlateqqinneqarsinnaanersoq imaatigut kabeliniinissamut suliniummi misissuiffigineqarsimavoq. Kabelilllu ilulissaniit Ilulissat Kangerluaninngaanneersuniit kittoraasoqarnissaa navianaateqartorujussuusinnaavoq, piffimmimi tassani sumiiffinni amerlasuuni ilulissat immap naqqani assaarujussuarsinnaasarput. Taamaattorli siunissami imaatigut kabelip Aasiannukartup Ilulissanut isumannaatsumik tallineqarsinnaanissaata periarfissaanissaa mattunneqarsinnaanngilaq.
Sooq-una sumiiffiit ilaanni VHF-ikkut attaveqartoqarsinnaanngila imaluunniit VHF-ikkut attaveqaatit ajornerusarpat?
VHF-radio radiop maligaasai atorlugit atorsinnaasarpoq. Radiop maligaasai tamakku qaqqanit killeqartinneqartarput. Taamaattumik radiukkut nassiussussutit tigusissutillu akornanni qaqqaqarsimagaangat attaveqaatit ajorsinnaasarput. Tamatuma saniatigut Kalaallit Nunaanni sumiiffeqarpoq VHF-ikkut ikittuinnarnik nassiussiffiusartunik.