Imarsiornermut suliassaqarfimmi suliassaqarfiit pingaarnersaanniipput imarsiornerup isumannaatsuunissaa, imarsiornermi inuussutissarsiutini pilersuinermilu siuariartortitsineq. Imarsiornermut suliassaqarfik Danmarkimiit maleruagassiivigineqarpoq, tassami taanna suliassaqarfiummut akisussaaffigilerlugu tiguneqarsimanngitsoq aammalu Danmarkimi Søfartsstyrelsimit isumagisarineqartoq. Kalaallit soqutigisaasa isiginiarneqarnissaat, Søfartsstyrelsip aamma Ineqarnermut Attaveqaasersuutinullu Naalakkersuisoqarfiup akornanni qanimut suleqatigiinnikkut qulakkeerneqartarpoq, ilanngullugu imarsiornermut inatsisinut atatillugu Kalaallit Nunaata mianerineqarnissaa. Imarsiornermut inatsisit Kalaallit Nunaanni kunngip peqqussutaasigut aammalu nalunaarutitigut taakkua tunngavigalugit aalajangersarneqartutigut, atuutsinneqalertarput.
Imarsiornermut Ataatsimiititaliaq
Imarsiornermut Ataatsimiititaliaq siunnersuisartuuvoq, tassani ilaatinneqarlutik oqartussat, inuussutissarsiortunit suliffeqartuniillu aallartitat. Ataatsimiititaliap suliassaat pingaarneq tassaavoq, immikkut Kalaallit Nunaanni pissutsit sillimaffigineqarnissaat siunertaralugu, inatsisinik suliaqarnermut tunngatillugu siunnersuinermik ikiuunnissaq. Imarsiornermut Ataatsimiititaliaq pingaartumik allakkatigut oqallittarfittut atuuppoq. Ineqarnermut Attaveqaasersuutinullu Naalakkersuisoqarfik Søfartsstyrelsimiit tusarniaanermut akissuteqaateqarnissaq siunertaralugu inatsisitigut suliniutissanut missingiummik tigusaqarpat, Naalakkersuisoqarfiup missingiutit taakkua Imarsiornermut Ataatsimiititaliami ilaasortanut ingerlateqqittarpai. Ilaasortat tusarniaanermut najoqqutassanut oqaaseqaatissaqarpata, taakkua Naalakkersuisoqarfimmut nassiunneqartussaappat, tassanngaaniit Søfartsstyrelsimut akissuteqaatip ingerlateqqillugu nassiunneqarnissaa isumagineqartarluni. Imarsiornermut Ataatsimiititaliamut tassanilu ilaasortanut attaveqaqatigiinneq tamarmi Naalakkersuisoqarfik, ataatsimiititaliamut allattoqarfittut siulittaasoqarfittullu atuuttoq, aqqutigalugu allaffissornikkut ingerlanneqarpoq.
Imarsiornermi Oqaloqatigiilluni ataatsimiinneq
Imarsiornermi Oqaloqatigiilluni ataatsimiinneq Politiinit, Arktisk Kommandomit, Danmarks Meteorologiske Institut-imit (DMI), Søfartsstyrelsimit aamma Geodatastyrelsimit ingerlanneqartarpoq. Ineqarnermut Attaveqaasersuutinullu Naalakkersuisoqarfik aqqutissiuussisutut inissisimavoq, aammalu qulequttanut sammisassanullu siunnersuutinik ilassuteqartarluni. Siunertaavoq innuttaasut oqartussallu akornanni pissutsinik pitsanngorsaaqataasinnaasumik aammalu nunatsinni imarsiornerup isumannaatsuunerata annertunerulernissaanut iluaqutaasinnaasumik, oqaloqatigiissitsinissaq.
Royal Arctic Line-mut kisermaassilluni ingerlatsinissamut akuersissut
Namminersorlutik Oqartussat Royal Arctic Line-mut Kalaallit Nunaannut aamma Kalaallit Nunaanniit kiisalu Kalaallit Nunaanni illoqarfiit nunaqarfiillu akornanni imaatigut assartuinermut tamarmut kisermaassilluni ingerlatsinissamut akuersissuteqarpoq. Ingerlatsinissamut akuersissuteqarneq malillugu Kalaallit Nunaata kitaani Tunumilu illoqarfinnut tamaginnut tikittarnerup akulikissusissai, pisinnaasaqarneq pilersuinerullu isumannaatsuunissaa pillugit pisussaaffiit arlaqarput. Taamaattumik umiarsuaatilik inuiaqatigiinnut kalaallinut inuuniarnermut aalajangiisuulluinnartumik pingaaruteqarpoq, tassami taanna nunarput tamakkerlugu pilersuinermut qulakkeerisuummat. Naalakkersuisut tassunga atatillugu imaatigut angalanissamut pilersaarutit nassiussanillu assartuinermut akigititat akuersissuteqarfigisartussaavaat.