Pisortat angallassisarnerat qulakkeersinnaaniarlugu Namminersorlutik Oqartussat kiffartuussinissamik isumaqatigiissutinik arlalinnik atsiorsimapput. Naalakkersuisut sullissisumut sullissisunulluunniit arlalinnut isumaqatigiissusiussapput, taakkulu inoqarfinnut arlalinnut aalajangersimasumillu akeq qaffasinnerpaaq atorlugu angallassinissamut periarfissanik neqeroortarnissamik pisussaaffeqarput. Isumaqatigiissutit piumasaqaatinik allanik aamma imaqarsinnaapput.
Kiffartuussinissamik isumaqatigiissutit sumiiffinnut makkununnga tunniunneqarsinnaasut Inatsisartut Aningaasanut Inatsimmi aalajangersaaffigisimavaat:
- angallassinissamut periarfissaqanngitsuni.
- akiliutigineqartussaq atorlugu amerlasuut angalarusunnginneranni.
- akiliutigineqartussaq akuerineqarsinnaanngitsumik appasippallaartillugu.
angallassinermut iliutsip ataqatigiinnera ajorsimatillugu.
Kiffartuussinissamik isumaqatigiissutit 2021-meersut
Naalakkersuisut 2020-mi ilaasunik angallassisarneq pillugu Air Greenlandimik, Disko Line-mik aamma Norland Air-imik isumaqatigiissusiorsimapput, taakkulu 2021-mi januaarimi aallartissimapput. Isumaqatigiissutit suliassaqarfinnut 10-nut agguarneqarsimapput:
- Kujataa Air Greenlandimit timmisartuussiffigineqassaaq, Disko Line-lu atorlugu imaatigut angallassiffigineqassalluni.
- Nunatta qeqqani nunaqarfiit - Air Greenlandimit timmisartuussiffigineqarput (ukiuunerani) Disko Line-imiillu 1. januaarimiit 31. december tikillugu imaatigut angalaffigineqartarlutik (1. januaarimiit 14. april tikillugu Sisimiuni nunaqarfiit minillugit)
- Qeqertarsuup Tunuani nunaqarfiit - Air Greenlandimiit timmisartuussiffigineqarput (ukiuunerani) Disko Line-miillu imaatigut angallassiffigineqarlutik (aasaanerani)
- Uummannap nunaqarfiini aamma Uummannamiit Qaarsunut angallassinerit - Air Greenlandimiit timmisartuussiffigineqarput
- Upernaviup nunaqarfii - Air Greenlandimit timmisartuussiffigineqarput
- Timmisartoq Qaanaamukartoq - Air Greenlandimiit timmisartuussiffigineqarpoq
- Qaanaap nunaqarfii - Air Greenlandimiit timmisartuussiffigineqarput
- Tasiilap nunaqarfii aamma Tasiilap Kulusullu akornanni angallassinerit Air Greenlandimiit timmisartuussiffigineqarput
- Nerlerit Inaannut timmisartoq Norland Air-imiit isumagineqarpoq
- Ittoqqoortoormiit Nerlerillu Inaata akornanni angallassinerit Air Greenlandimiit timmisartuussiffigineqarput
Kiffartuussinissamik isumaqatigiissutit Kujataa minillugu ukiunut 10-nut atuuttussatut atsiugaapput, taakkulu Qaqortumi mittarfissap nutaap ammarneranut atatillugu neqeroorutigeqqinneqassapput. Ilaassutissanut, allakkanut assartukkanullu akit qaffaaffigineqassanngillat, matumani aningaasat naleerukkiartornerisa akillu allanngorarnerisa kingunerisaannik akinut iluarsiinerit minillugit.
Sinersortaat pillugu kiffartuussinissamik isumaqatigiissut
Naalakkersuisut sinersortaammik Sarfaq Ittummik angallassinissaq pillugu Arctic Umiaq Line-imik kiffartuussinissamik isumaqatigiissusiorsimapput.
Nittartakkanut iserfissat