Qulimiguullit napparsimasunik takornarianilluunniit angallassisinnaappata sooq nunaqarfitsinnut timmisartukkut angallassisoqarsinnaanngila?
Timmisartukkut angallassinerit qulimiguulinnut mittarfimmut akuerisaasumut pisassasut inatsisitigut piumasaqaataavoq. Napparsimasunik takornarianilluunniit timmisartuussinerni allani miffissanut timmisartup aquttuata miffissatut tulluartutut naliligaanut pisinnaapput. Tamanna inissamik nammineq toqqaanertut taaneqartarpoq. Inissaq nammineq toqqagaq qaammammut amerlanerpaamik sisamariarluni atorneqaqqusaavoq.
Sooq nunaqarfitsinnut imaatigut silaannakkullu angallassisoqarsinnaanngila?
Nunaqarfiit amerlanerpaartaat imaatigut silaannakkullu angallassiffiusarput. Inoqarfiit ilaat ukiuunerani silaannakkut tikinneqartarput, aasaaneranilu imaatigut tikinneqartarlutik, ilaallu ukiuunerani aasaaneranilu tikinneqartarlutik. Tamatumani ilaatigut apeqqutaasarpoq qanoq neqeroortoqartigalunilu piumasoqartiginersoq imaluunniit tikiffissaq ukioq naallugu angallassiffiusinnaanersoq. Taamaasilluni ukiup qanoq ilinera imaluunniit tikiffissamut pineqartumut qanoq piumasoqartiginera apeqqutaallutik tikiffissat ilaat imaatigut taamaallaat tikinneqarsinnaassapput, allalu silaannakkut imaatigullu tikinneqarsinnaassallutik. Suliassat kiffartuussinissamik isumaqatigiissutini malittarisassiorneqarput.
Nunaqarfiga piffissami imaatigut tikinneqartussatut pilersaaruteqarfiusumi tikinneqarsinnaassanngippat qanoq iliussaanga?
Imaatigut angalanissaq periarfissaasimanngippat, ilaassutissamillu pisereersimassaguit, Disko Line allatut iliorluni tikiffissamut anngunnissannut pisussaaffeqarpoq. Tamanna amerlanertigut qulimiguulitik atorlugu pisarpoq. Matumani qulimiguulimmik piareeqqasoqarnersoq apeqqutaavoq. Qulimiguullit angalaffissanut pilersaarutaat nunaqarfiit ilaannut angallassisoqareernerata kingorna pilersaarutaareertarmata tamanna sumiiffimmi qulimiguulimmik piareeqqasoqannginneranik kinguneqarsinnaavoq.Umiarsuaq/timmisartoq ilaaffissara taamaatiinnarneqarsimappat imaluunniit kinguaattoorsimappat kina unnuinermut nerisaqarnermullu akiliissava?
Kiffartuussinissamik isumaqatigiissut atorlugu ilaasussaq Kalaallit Nunaata iluani sullissisumiit angalatinneqalersimappat sullissisoq pineqartoq ilaasup ineqartinnissaanut nerisaqartinnissaanullu pisussaaffeqarpoq, matumani ilaasussap angalanissaa imaluunniit angalanissap ilaa ingerlanneqarsinnaanngippata. Taamaattorli sullissisut malittarisassaat eqqumaffigineqassapput. Illit angalanerit ingerlatseqatigiiffinniit assigiinngitsuniit isumagineqarsimappat tamanna imaanngilaq pisussaaffinngussasoq. Taamaammat angalanissannut sillimasersimanissat innersuussutigineqarpoq.Nunaqarfinnut tikittoqartartillugu sooq allakkanik / nassiussanik tigusaqarneq ajorpunga?
Imaassinnaavoq ilaasussat siulliullugit salliutinneqartarmata allakkat nassiussallu inissaqartinneqarsimanngitsut. Sullissisut ilaasussanik salliutitsisassasut, kingornagullu allakkat nassiussallu tullinnguuttassasut, isumaqatigiissutini allaqqavoq.
Sumut naammagittaalliorsinnaavunga?
Sullissisoq siullertut naammagittaalliorfigisassavat. Sullissisumiit naammaginanngitsumik akineqarsimaguit Ineqarnermut Attaveqaasersuutinullu Naalakkersuisoqarfimmut naammagittaalliorsinnaavutit, naalakkersuisoqarfiullu kiffartuussinissamik isumaqatigiissutit eqqortinneqarsimanersut misissussavaa.