Kalaallit Nunaanni suluusalinnut 13-inik mittarfeqarpoq qulimiguulinnullu 46-nik mittarfeqarluni, taakkulu angallassinermut atorneqarput. Kangerlussuarmi Narsarsuarmilu suluusalinnut mittarfiit atlantikoq qulaallugu mittarfiupput, taakku Atlantikoq qulaallugu timmisartumik angallassinernut atorneqarput. Mittarfiit sinneruttut 11-iusut nunap immikkoortuini mittarfiupput mikinerusut. Qulimiguulinnut mittarfiit 46-sut nunaqarfinni kiisalu illoqarfinni Uummannami, Tasiilami aamma Ittoqqoortoormiini inissisimapput. Illoqarfiit taakkua nunaqarfinnut qanininnerusunut qulimiguulinnut mittarfilinnut qulimiguulimmik timmisartuussiffiusarput.
Pisortat mittarfiutaasa saniatigut mittarfinnik qulimiguulinnullu mittarfinnik taamaallaat ilisimatusarnermut, aatsitassarsiornermut aamma sakkutooqarnikkut siunertanut kiisalu Tusass' A/S-imit atorneqartunik peqarpoq.
Kalaallit Nunaanni Namminersornerullutik Oqartussat 1986-imi mittarfinnut qulimiguulinnullu mittarfinnut akisussaaffik tigusimavaat. Tamanna Kalaallit Nunaanni mittarfeqarfissat, maanna Mittarfeqarfiit A/S, pilersinnerannik kinguneqarsimavoq, mittarfeqarfiillu 1988-miilli Kalaallit Nunaanni pisortat mittarfiutaannik ingerlataqarsimapput.
Silaannakkut angallannermut suliassaqarfimmi malittarisassiornermut akisussaaffik suli tiguneqarsimanngilaq. Tamanna isumaqarpoq Danmarkimi Trafikstyrelsen malittarisassiortartoq, Kalaallit Nunaannilu mittarfinnik nakkutilliisuulluni. Malittarisassat mittarfinnut nunani tamalaani malittarisassat tunngavigalugit aalajangersagaapput, taakkulu ICAO-imit (International Civil Aviation Organization) suliaapput.
Mittarfissat nutaat nutaamillu aaqqissuussineq
Inatsisartut 2015-imi mittarfissat nutaat sanaartorneqarnissaat pillugit tunngaviusumik aalajangiussinermik akuersissuteqarput, matumani Nuuk, Ilulissat Qaqortorlu siulliutillugit. Naalakkersuisut tamatuma kingorna ingerlatseqatigiiffik Kalaallit Airports A/S pilersippaat, matumani mittarfiit taakkua sanaartornissaat, pigilernissaat ingerlannissaallu siunertaralugit. Inatsisartut 2018-imi sanaartornermut inatsit akuersissutigaat, tassanilu Naalakkersuisut mittarfissanut pingasuusunut sulinerup aallartinnissaanut piginnaatinneqarput.
Mittarfissat nutaat naammassineqareerpata massakkut ingerlatsinermut attaveqaasersuutit allanngorumaartut Inatsisartut aalajangiinerisa kingunerissavaat. Kalaallit Airports A/S Nuummi Ilulissanilu atlantikoq qulaallugu mittarfissanut nutaanut Qaqortumilu nunap immikkoortuani mittarfissamut nutaamut akisussaasuussaaq, Mittarfeqarfiit A/S-ilu mittarfinnut qulimiguulinnullu mittarfinnut sinneruttunut ingerlatsissalluni.
Ingerlatsinermi ataatsimoorluni ingerlatsinermi iluaqutissat pissarsiffiginissaat siunertaralugu aammalu inuttut aningaasaqarnikkullu nukissat atorluarsinnaaniarlugit Mittarfeqarfiit aktiaateqarluni ingerlatseqatigiiffinngortinnissaat Inatsisartut 2022-mi akuersissutigaat, matumani Kalaallit Airports Holding A/S-imut aningaasaliinissaq siunertaralugu.
Naalakkersuisut Inatsisartut akuersinerat taanna atorluarsimavaat, Mittarfeqarfiillu ullormi 30. december 2022 pilersinneqarpoq, KAIR A/S-imullu ullormi 31. marts 2023 ilaalerluni.