Kalaallit Nunaanni silaannakkut angallannermut suliassaqarfimmi malittarisassiornermut nakkutilliinissamullu Trafikstyrelsen akisussaavoq. Suliassaqarfimmut inatsiseqartitsineq Inuinnaat Silaannakkut Angallannerannut Aalajangersakkat arlallit atornerisigut suliarineqarpoq, tamannalu aqqutigalugu isumannaatsuunissaq, mittarfiit ilusissaat, radiukkut attaveqaatit, timmisartumik aquttut allallu silaannakkut angallassinermi sulisut il.il. ilinniarnissaannut piumasaqaatit malittarisassiorneqarput.
Kalaallit Nunaanni timminissamut akuersissutit
Kalaallit Nunaata timmisartuussiffiginissaani Trafikstyrelsenip akuersisimanissaa pisariaqarpoq. Silaannakkut angallassinermi ingerlatseqatigiiffiit namminersortullu tamarmik Kalaallit Nunaannut Kalaallit Nunaanniillu kiisalu Kalaallit Nunaata iluani timmisartorusuttut timmisartuussinerup akuerineqarnissaa pillugu Trafikstyrelsenimut qinnuteqassapput.
Namminersorlutik Oqartussat timmisartuussinermi arlaatigut naalakkersuinikkut aningaasaqarnikkulluunniit sunniuteqartoqassanersoq pillugu taasaqarusunnerannut tunngatillugu Trafikstyrelsen Namminersorlutik Oqartussanut tusarniaassaaq. Qinnuteqartoq taamaasilluni taamaallaat Trafikstyrelsenimik attaveqartussaavoq.
Sumiiffinnut timmisartuussisarneq
Sumiiffinnut timmisartuussisoqarsinnaassappat akuersissut tassungalu atatillugu timmisartuussinissamut akuersissut pisariaqartinneqarput, taakkulu Trafikstyrelsenimit tunniunneqassapput.
Silaannakkut angallannermut nunanullu allanut suliassaqarfiit suli tiguneqarsimanngimmata Kalaallit Nunaat nunat marluk isumaqatigiissutaannik Danmarkip nunanut allanut tunngatillugu atsiorsimasaanik pisariaqartitsivoq.
Naalagaaffeqatigiinnerup iluani timmisartuussisarnerit nunami namminermi timmisartuussinertut isigineqarput. Tamannalu tunngavigalugu silaannakkut angallassinermi ingerlatseqatigiiffimmut Naalagaaffeqatigiinnerup avataaniittumut Danmarkip Kalaallit Nunaatalu akornanni sumiiffinnut timmisartuussisarnissamut akuersissummik pissarsinissaq aallaaviatigut periarfissaassanngilaq. Air Greenland silaannakkut angallassinermi ingerlatseqatigiiffituaavoq Danmarkip Kalaallit Nunaatalu akornanni aamma Kalaallit Nunaata iluani sumiiffinnut timmisartuussinissamut tunngaviusumik akuersissummik pigisaqartoq, tassungalu atasumik sumiiffinnut timmisartuussinissamut akuersissummik pigisaqartoq.
Islandimik nunat marluk isumaqatigiissutaannik atsiortoqarsimavoq, tamannalu ilaatigut isumaqarpoq Islandimi timmisartuutileqatigiit Icelandair aamma Norlandair kiisalu Kalaallit Nunaanni timmisartuutileqatigiiffik Air Greenland Kalaallit Nunaata Islandillu akornanni akuersissummik pigisaqartut, tassungalu atatillugu sumiiffinnut timmisartuussisarnissamut akuersissummik pigisaqartut.