Aqqusinikkut angallannermut malittarisassat sumiffinnut tamanut aqqusinikkut angallaffiusunut atuutsinneqarput.
Inatsisit Færdselsstyrelsimiit suliarineqartarput Folketingimiillu akuerineqartarlutik. Inatsisit Kalaallit Nunaanni pissutsinut naleqqussarnissaat pillugu Attaveqaasersuutinut Immikkoortortaqarfik Færdselsstyrelsimik suleqateqarpoq.
Kalaallit Nunaanni Kalaallit Nunaannut Angallanneq pillugu Inatsit nalunaarutit ilaatillugit atuutsinneqarpoq. Kalaallit Nunaanni Politiit inatsisit eqqortinnissaannut nakkutiginninnissamut akisussaapput. Taamaammat Færdselsstyrelsen aamma Kalaallit Nunaanni Politiit angallannermut inatsip qanoq paasineqarnissaanut akisussaatinneqarput.
Attaveqartarnermut ataatsimiititaliaq pilersinneqarsimavoq, tassanilu angallannermut inatsimmi allannguutit oqaluuserineqartarput. Ineqarnermut Attaveqaasersuutinullu Naalakkersuisoqarfik Namminersorlutik Oqartussat sinnerlugit peqataasarpoq. Naalagaaffimmi oqartussaniit Færdselsstyrelsen aamma Transportministeriet peqataasarput. Rigspolitiet aamma Vejdirektoratet pisariaqartitsineq naapertorlugu peqataasarput. Færdselsstyrelsen attaveqartarnermut ataatsimiititaliamut siulittaasuuffeqarpoq.
Inatsisinik allanngortitsinissanut inassuteqaatinik suliaqartoqartillugu Ineqarnermut Attaveqaasersuutinullu Naalakkersuisoqarfik kommuninik allanillu soqutiginaatilinnik peqataatitsiniartarpoq.